U ba’atéel kuxtal ich káak’náab

Máax ts’íibtej: Nicole Vasconcelos Fujii

José Natividad Ic Xec sut ich maayat’aan

Ja’abilja’ab yaan kex 100 000 u ba’alche’il k’áak’náab ku kíimil chéen tumen u pu’ulul sojol ich ja’, sojol u k’aaba plásticos. Le je’ela’ u tsoolil bix je’el k kanáantik káak’náab uti’al paalal tu paach k’iine’, ku ts’o’okole’ ka u kanáanto’ob xan.

Ba’ax k’áak’náab, ba’axten jach k’a’ana’an

Kéen in wa’al káak’náabe’ tin tuuukule’ ti’ yaan tuláakal u ch’óoch’ ja’il yóok’olkaabi’. Le yóok’lale’ tuláakal ba’al ku yúuchuj ti’ junts’éele’ yaan ba’al u yil xan yéetel u láak’ u tséelilo’ob yaan táanxel tu’uxil.

La lucha entre vida y basura en el océano

“Tu chi’ k’áak’náab tu’ux ma’ jach taam u ja’ile’ ya’abkach mejen ba’al ku kuxtali’; jáatsunjáatso’ob yaniki’, junjaats ichilo’obe’ leti’ le ku ya’ala’aj arrecifes de coral ”. Tu’ux ch’a’abij: Sgr/Unsplash; Christofoletti (2019).

K’áak’náab méek’majij u ya’abil yóok’olkaab, kex 70% u wóolisil lu’um u bulmaj. Ichile’ ti’ ku kajtal kex 250 000 jejeláas ba’alche’ob k k’aj óola’amij, yéetel xan le ma’ k k’aj óola’ano’obo’. Bey túuno’ k’áak’náabe’ u yotoch jejelás ba’alche’, u yotoch jejelás xíiwo’ob xan, ku ts’o’okole’ leti’ ts’áajik u p’iis u yooxolil yóok’olkaab, u k’áaxal waj ma’ u k’áaxal cháak, leti’ ts’áajik u xa’ak’il yóok’olkaab.

Ti’ jump’éel tsikbal tu beetaj online, ix bióloga Tássia Biazon ku ya’alike’ kuxtalil yaan ich k’áak’náabe’ leti’ bin taasik kuxtal xan yóok’olkaab, yéetel uláak’ ba’alob uti’al u kuxtal máak (servicios ecosistémicos u ya’alik). Ku ya’alike’ kex táanchumuk le ma’alob iik’ ku ch’a’ajik’tik wíinike ti’ u taali’, tumen k’áak’náabe leti’ chu’uchik dióxido de carbono ku ts’o’okole’ ku jelbesike’ ku jóok’sik bey ma’alob iik’e’ (oxígeno). Le je’ela’ ku yúuchuj chéen tumen tu yóok’laj u mejen xíiwil k’áak’náab fitoplancton u k’aaba’. Ba’ale’ ma’ chéen le je’ela’, k’áak’náabe’ leti’ beetik u sa’ap’aj ja’, leti’ beetik xan u k’áaxal tu ka’ téen. U ya’abil ja’ yaan yóok’olkaabe’ ch’óoch’ ja’, le yóok’lale’ k a’alike’ k’áak’naab taasik ja’ ku k’áaxal tu yóok’ol kaab. Leti’ sutik yóok’olkaab ja’ ku sa’ap’aj.

Ba’ax k’askúuntik u ja’ail k’áak’náab

Tuláakal ba’al kuxa’ane’ k’a’abéet ja’ ti’ ti’al u kuxtal, kex chéen jump’íit’. Le yóok’lale’ unaj k sáasilkúuntike’ ba’ax ku beetik wíinik ti’al u k’askúuntik k’áak’náab. Ti’ le je’ela’ unaj k kanáantik ba’ax bapalo’obil k k’a’abéetkúunsik.

U pu’uluj sojol chéen beyo’

Ya’ab ba’al k’askúuntik k’áak’náab, ma’ chéen ba’al ku pu’ulul je’el bix ku tukultik yaan k’iin máake’. Tuláakal ba’ax ku bin u yáalkab ti’ le ba’ax ku ya’alaj alcantarillado ku k’askúuntik k’áak’náab, je’el bix detergentes, u yaalab ts’aako’ob, ba’al yéetel ku p’o’ nook’ máak xan. Beyxan fertilizantes yéetel pesticidas. Ba’ale’ beeyxan ku k’astaj ja’ tumen u yáalkab purines, u yaalab u wiix u ba’alche’ilo’obil k’áax, u ja’il cháak, u ja’il u ta’ ba’alche’ob xan.

Ku ya’alik Foro Económico Mundial de Davos, waj ma’ k p’atik ba’ax k beetika’ tu ja’abil 2050 bine’ plasticos bin u ya’abil ba’ax kun yantal ich k’áaknáab, ma’ kayi’. U talalamil bine’ máatak wíinike’ ocho millones u toneladasil sojol ku pulik ja’abilja’ab ich k’áak’náab, u ya’abile’ plástico. Bey ka láala’ak jumpéel camión sojol ich káak’naab junjun minutoe’.

Chéen uti’al ka u yil máake’, Paraná, Argentina, chéen ti’al u veranoil 2018 mo’ol 760 u toneladasil sojol tu jáal k’áak’náab, bey ya’alik u ja’alachil.

Ba’ale’ ma’ chéen le je’elo’: Ja’abilja’ab bine’ yaan kex 100 000 u ba’alche’il k’áak’náab ku kíimil tu yóok’laj u pu’uluj plastico ich ja’, bey u ya’alik Universidad Queensland (Australia).

U we’ekel petróleo

U we’ekel ich ja’ le ku ya’ala’aj petróleo yéetel u jeel productos químicos jump’éel ba’al kíimil uti’al sijnáal tumen ku kupik yiik mejen yik’lel k’áak’náab, beyxan ku kíinsiko’ob seten ya’ab u ch’iich’il ja’, kay, beyxan le ku ya’alaj coral.

El 99 % de las aves marinas habrá comido plástico para 2050

Ba’al ti’al tukulbij.
U meyaj: Giovanna Prata Fontes.U xaak’al: Winkel (2018), ANDA (2020).

Tu ja’abil 2050 óoli’ tuláakal u ch’íichil k’áak’náabe’ ts’o’ok bin u túuntik plástico.
Tu ja’abil 2050 u ya’abil ba’al ich k’áak’náabe’ ma’ kayi’, plástico bin.

Ja’abilja’abe’ 8 millones toneladas sojol ku pu’uluj ich k’áak’náab bin
Ja’abilja’abe’ 100 mil u túulul u ba’alil k’áak’náab ku kíimij tu yóok’laj plastico

Bix u yéek’kunsa’al u ja’il k’áak’náab

Kúuchilo’ob meyaj industrias u k’aaba’obo’ yéetel xan le ku ya’ala’aj centrales eléctricaso’ yaan ba’al yilo’ob xan yéetel le talamil tu yóok’oj k’áak’naaba’. Chéen ti’al ka a wile’ le ku ya’ala’aj centrales termoeléctricas ku k’áabetkunsikob ja’ tial u síiskuntiko’ob u nukuch un’ukul u meyaj, ba’ale ku tsokoj u meyaje’ le ja’o’ ku su’utuj ich k’áak’náab. Lela’ yajil ti’al ba’al ku kuxtal ich ja’, tumene’ yaan ku kimili’ (ja’e’ ku chokotaj tak 15C). Ku ts’o’okole’ ich k’áak’náab ku yúuchuj xan le ku ya’ala’aj eutrofización. Le je’ela’ ku yúuchuj kéen we’ekek ich k’áak’náab jejelás éek’ ja’ob (éek’ ja’il yotoch máak, éek ja’ail u nukuch kúuchilo’ob meyaj, industrias ku ya’ala’alo’). Bey xan ku yúuchuj eutrofización waj ma’ ma’alob u meyajta’al le ku ya’alaj abonos orgánicos (pesticidas yéetel fertilizantes).

U láala’aj ich k’áak’náab le je’elo’oba’ leti’ ayik’akúuntik jaanal ich ja’, bey u yóol máak jach ma’alobe’ ba’ale’ ma’, tumen kíimil uti’al mejen yik’lel k’áak’náab. Le je’ela’ tumen u ya’abil le jaanalo’ leti’ beetik u tóop’ol u seten ya’abil le ku ya’alaj algas microscópicas yéetel cianobacterias. Le je’eloba’ ku tatkunsiko’ob ja’ beyo’ ma’ táan u páajtaj u máan u juul k’iin. Le beetike’ ya’ab u xíiwil k’áak’náab ku kíimil tumen mina’an k’iin ti’ ti’al u beetik fotosíntesis tial la kuxlak. Ba’ale’ u kíimil le je’eloba’ u xu’uluj xan u meyajob ti’al u túuxtiko’ob ma’alob iik’ yookolkaab, túumben iik’ ti’al u ch’a’ajik’tej wíinik yéetel ti’al ka yanak u yo’och.

Mejen p’u’up’u’uy plásticos

Míin a k’aj óol le ku ya’ala’aj purpurinao’, le mejen ma’ay plasticos ku meyaj ti’al jats’utskúuntik tuláakal ba’al. Ti’al u báaxta’al carnaval ti’ yani’, ti’al u jats’utskúunta’al báaxal ich najil xook leti’ u biilal xan. Jach táaj mejentak, ba’ale’ jach jats’utstak. Le purpurina ku ya’ala’ala’ jach ku taasik k’aasil ti’al u kuxtalil ich k’áak’náab.

Chéen xéexet’el plásticos copolímeros, aluminio, titanio, hierro yéetel u jeel ba’alo’ob le ku ya’ala’aj purpurinao’. Leti’ob beetik u léets’bal ti’al ka juulnak. Ba’ale’ ma’ ma’alobi’: mix jump’éel ku páajtal u ka’ ch’a’abaj ti’al k’a’abéetkúunsbili’, ku ts’o’okole’ ma’ táan u lu’umtaj kex máanak 400 ja’ab.

Ba’al jach chichan, ba’al jach sajbe’entsil xan

Je’el bix u máan k’iine’ le ku ya’ala’aj botellas waj envases ku bin u k’astaj, ku p’u’uytaj tak ken p’áatak chéen mejen microplásticos, je’el bix yanik le purpurinao’. Ba’ale’ u talamil xane’ máatak le je’ela’ ku chu’uchik ba’al jach ma’ ma’alob ti’al sijnáali’ je’el bix le ku ya’ala’aj plaguicidas waj metales pesados yéetel u jeel le ku ya’alaj contaminantes orgánicos persistentes . Leti’ob jach k’askúuntik sijnáal.

Ku ts’o’okole’ plásticoe ku taasik bisfenol, jump’éel ba’al beetbil tumen wíinik (compuesto orgánico sintético) ku seen taasik k’oja’anil je’el bix cáncer, abortos, infertilidad, diabetes, síndrome ovarios poliquísticos, yéetel u jeel talamil ti’ aalak’o’ob beyxan ti’ wíinik.

U mejen aalak’il k’áak’náab jaantik microplasticose’ ku k’oja’antal, ba’ale’ u yajil xane’ máatak le je’elo’oba’ ku jaanta’al tumen u nukuch aalak’o’obil k’áak’náab, le je’elo’ob túuna’ ku k’i’itbesiko’ob k’oja’anil, bey túun u k’askúunsiko’ob ba’al jaantbil yéetel xan ku k’oja’ankúunsik wíinik.

Ti’ jump’éel u ts’íibe’ Sociedad Química Americana tu ya’alaje’ 15 u túulal u aj miatsilo’obe’ tu xak’alto’ob waj ma’alob ta’ab ku jaanta’al. Yáaxe’ tu molo’ob u jejeláasil ta’ab ku ko’onol ich 15 nojkúuchilo’ob tu nojkaajil China, ka tu yilajo’obe’ ichile’ yaan u mejen xéexet’al plastico ich tuláakalo’ob. Ti’ u jeel xak’al ts’aaban k’aj óoltbil tumen The Guardian beyxan tu kaxto’ob microplasticos ich u ta’abil Reino Unido, Francia, España, Estados Unidos yéetel xan China. Microplasticose’ ti’ yaan iike’, ti’ yaan ich ja’e’, ti’ yaan xan tu ta’abil jaanal tuláakal u kaajilo’ob yóok’olkaabe’.

Ba’ale’ ma’ chéen le je’elo’: u aj miatsilo’ob Sociedad Química Americana ku ya’aliko’obe’ tuláakal máak ku jaantik kex cinco gramos ta’abe’ (le a’ala’a tumen Organización Mundial de la Salud) ku jaantik xan kex 1 000 u mejen xéexet’el plástico ja’abilja’ab. Ichil u kaajnáalilo’ob Europa tu’ux jach ki’ u jaantiko’ob mariscose’ junjuntúule’ ku jaantik tak 11 000 u mejen xéexet’al microplástico ja’abilja’ab.

U jeel xaak’al beeta’ab tumen Philipp Schwabl, juntúul u aj miatsil División Gastroenterología yéetel Hepatología Universidad Médica Viena, Austria, leti’ yáax ilejj ich u ta’ wíinike’ yaan bin xan microplásticos. Ich le diez u jejeláasil plastico yaan túune’ nueve jump’éelel chíikpajij ich u ta’ wíiniki’.

Walkila’ u súutukil k k’exik le ba’ax ku yúuchula’. K’óom óolal lo’obal, sajbe’entsil lo’obal.

Chéen waj jayp’éel ba’al ku beeta’al

U ma’alobile’, wíinike’ ts’o’ok u kaxtik waj jayp’éel ba’al u beet ti’al u xáak’abtik le talamil yaan tumen u k’askúunta’al k’áak’náabe’. Ba’ax u k’áate’ ka yanak toj óolal tu pach k’iin, u toj óolal sijnáal xan.

U mo’oloj sojol jáal k’áak’náab

Tu nojkaajil Río de Janeiro, Brasil, yaan junjaats wíinik ku meyaj xma’ bo’olil. Garis do mar  u k’aaba’. U aj meyajo’obe’ Núcleo Maré u k’aaba’, le jela’ u místiko’ob jáal ja’, u moliko’ob sojol xan. Ku moliko’ob sojol ti’al u kaláantiko’ob jáalja’ u k’aaba’ Amores, te’ tu kaajil Barra da Tijuca, ti’ Río de Janeiro. Ku moliko’ob tak jump’éel tonelada sojol chéen ti’i jump’éel kilometro jáal ja’. Plasticos u ya’abil ba’al ku moliko’ob, ba’ale’ walkila’ ma’ chéen plasticos beeyxan pixchi’ob ku k’áábéetkunsa’al ti’al ma’ u páak’aj COVID-19 ti’ máak.

U k’iinilo’ob Océanos

Tu ja’abil 2017 u Asamblea General Organización Naciones Unidas (ONU) tu líik’saj u t’aanile’ u ja’abilo’ob bin 2021 tak 2030 u k’aaba’ bine’ Década de la Ciencia Oceánica para el Desarrollo Sostenible. Ba’ale’ k’aj óolanile’ Década de los Océanos. U tuukulil le péektsila’ u yoksik tu pool máak unaj u kaláanta’al k’áaknáab, unaj u kaláanta’al xan buka’aj ba’al ku kuxtali’. U tuukulile’ u much’ik u ya’abil aj miatso’ob ti’al u mu’uk’antiko’ob u meyajta’al le ku ya’alaj ODS (Objetivos de Desarrollo Sostenible). Ich le je’ela’ u nojba’alile’ leti’e’ u kamp’éelo’: bey ya’alika’:

“U kanáanta’al ma’ u k’astaj k’áak’náab, u kaláanta’al bix u ch’a’abaj buka’aj ba’al ku ts’éentik k’áak’náab ti’al ma’ u xu’ulul tu paach k’iin”

Le ku ya’ala’aj Década de los Océanos jump’éel ba’al ma’ chéen uti’al jala’acho’ob waj mola’ayo’obi’, unaj u táakpajaj xan kaajnáalo’obi’, ba’ale’ kajnáal u k’aat ma’ u k’askuunsa’al k’áak’náab.

Década de los Océanos

U meyaj: Nicole Vasconcelos. U xaak’al:  Christofoletti (2019).

Bix je’el u yáantaj máake’ 

Tuláakal ba’ax ku beetik mola’ayo’obe’ jach ma’alob, ba’ale’ mina’an u biilal waj kaajnáale’ ma’ u nupikubáaj ti’ le meyajo’, ma’ u k’exik ba’alo’ob suuk u beetik ich u kuxtal. Jach k’a’ana’an ka u k’ex máak ts’ets’e’ek ba’al suuk u beetik, mejen ba’al ba’ale’ je’el u yáantaj ti’al ma’ u k’astaj yóok’ol kaabe’.

Le je’elo’oba’ kex waj jayp’éel ba’al je’el u páajtal k beetike’:

Uti’al ma’ u taasik to’on talamil le ku ya’ala’aj purpurina, yaan waj jayp’éel ba’al je’el k beetike’:

  • K k’exik purpurina yéetel yaanal ba’al, jump’éel beeta’anil yéetel ba’al sijnáal, ku ts’o’okole’ ma’ u k’oja’ankúunsik máak, mix taan u k’askuntik sijnáal.
  • ¡Beet ta wotoch a purpurina! (https://www.ecycle.com.br/6267-glitter-ecologico.html);
  • Ma’ manik ba’al yaan le ku ya’alaj polietileno waj polipropileno, tumen waj beyo’ taak ya’alike’ yaan microplásticos ti’.

U jeel ba’al je’el u meyaj xan ich u kuxtal máake’ leti’ le ku ya’ala’aj 7 R, u t’aan ix bióloga Tássia Biazon:

  1. U ma’alob tukultik ba’al máak.
  2. Ma’ a chíimpoltik ba’al.
  3. A bin a p’íitkunsik.
  4. A wutskíinsik.
  5. U ka’ meyaj tech jump’éel ba’al.
  6. A molik ba’alo’ob.
  7. A ka’ cha’ajik meyaj tech.

Ku ya’alike’ u jach ma’alobil waj taak a kaláantik k’áak’náabe’ ma’ unaj a p’atik u k’uchuj sojoli’. U ma’alobil xane’ ma’ k páak’tik u k’astaj ba’al, beyo’ ma’ u k’uchuj u k’iinil u yantaj k utskíinsik.

Unaj k meyaj walkila’ tumen beyo’ sáamal ka’abeje’ ma’ u yantaj sojol k’askúuntik sijnáal.

“Le k’áak’náab jach ka’ana’an to’one ti’al ba’ax k tukultik tu paach k’iin”.

Ts’íibo’ob ku máanchi’ita’aj te’ meyaja’, yéetel xane’  tu’ux je’el a xokik u jeel ba’al tu yóok’lale’

ANDA. (5 de maio, 2020). Plástico mata 100 mil animais marinhos todos os anos. Catraca Livre. Recuperado de https://catracalivre.com.br/cidadania/plastico-mata-animais-marinhos/

Azevedo, F., & CBN Curitiba e Assessoria. (27 de dezembro, 2018). Cerca de 100 mil animais marinhos morrem por ano vítimas do lixo jogado na praia. Paraná Portal. Recuperado de https://paranaportal.uol.com.br/geral/cerca-de-100-mil-animais-marinhos-morrem-por-ano-vitimas-do-lixo-jogado-na-praia/

Brasil Escola. (s.d.). Eutrofização. Recuperado de https://brasilescola.uol.com.br/biologia/eutrofizacao.htm

Brasil Escola. (s.d.). Poluição da água. Recuperado de https://brasilescola.uol.com.br/biologia/poluicao-aguas.htm

Castañeta, G., Gutiérrez, A. F., Nacaratte, F., & Manzano, C. A. (2020). Microplásticos: un contaminante que crece en todas las esferas ambientales, sus características y posibles riesgos para la salud pública por exposición. Revista Boliviana de Química, 37(3), 160-175. Recuperado de https://pubs.acs.org/doi/abs/10.1021/acs.est.5b03163?source=cen&

Christofoletti, R. (7 de maio, 2019). Sem oceanos, um futuro impossível. Ciência Hoje. Recuperado de https://cienciahoje.org.br/artigo/sem-oceanos-um-futuro-impossivel/

Da France Presse. (20 de janeiro, 2016). Oceanos terão mais plástico do que peixes em 2050, diz estudo. Globo.com. Recuperado de http://g1.globo.com/natureza/noticia/2016/01/oceanos-terao-mais-plasticos-do-que-peixes-em-2050-diz-estudo.html

eCycle. (24 de outubro, 2018). Está confirmado: o intestino humano também tem microplásticos. Recuperado de https://www.ecycle.com.br/component/content/article/13-consuma-consciencia/6847-microplasticos-no-corpo-humano.html

eCycle. (14 de setembro, 2017). Há microplásticos no sal, nos alimentos, no ar e na água. Recuperado de https://www.ecycle.com.br/5914-microplasticos.html

eCycle. (18 de janeiro, 2016). Microplástico no sal de cozinha: é verdade?. Recuperado de https://www.ecycle.com.br/

eCycle. (s.d.). Microplásticos já contaminam até água em garrafa. Recuperado de https://www.ecycle.com.br/

Legnaioli, S. (s.d.) Glitter ecológico: receitas caseiras para brilhar. eCycle. Recuperado de https://www.ecycle.com.br/6267-glitter-ecologico.html

Legnaioli, S. (s.d.). Glitter é insustentável: conheça alternativas. eCycle. Recuperado de https://www.ecycle.com.br/5312-glitter.html

Thayane  Zanchetta  Honorato. (19 de outubro, 2015). Os 7 R`s. Recuperado de http://thayconsultoria.com.br/blog/sete-erres.html

Winkel, S. (1 de agosto, 2018). Estamos criando um oceano de plástico? Nova Escola. Recuperado de https://novaescola.org.br/